حسین ملزم جس پر خواتین دل و جان سے فدا..................bbc urdu

پولیس نے 30 سالہ جیریمی ميِكس کوگرفتار کر کے اُن کا یہ مگ شاٹ یا چہرے کی تصویر اپنے فیس بک صفحے پر شائع کی تھی

بالی وڈ یا لالی وڈ کی فلموں میں دل چرانا یا دل کے ارمانوں پر ڈاکے پڑنے کی بات عموماً ہوتی ہے مگر امریکہ میں پولیس محکمے کے سرکاری فیس بک صفحے پر پوسٹ کی گئی ایک مشتبہ مجرم کی تصویر نے ہزاروں کے دل چرا لیے ہیں۔

پولیس نے 30 سالہ جیریمی ميِكس کو 19 جون کو گرفتار کر ان کا مگ شاٹ یا چہرے کی تصویر اپنے فیس بک صفحے پر شائع کی تھی جو ایک معمول کی کارروائی

پولیس کو یہ اندازہ نہیں تھا کہ اس حسین مشتبہ مجرم کی تصویر فیس بُک پر اتنی مقبول ہو جائے گی کہ اب تک تقریبا 88 ہزار مرتبہ لائک کیا جا چکا ہے جبکہ اسے 11500 سے زیادہ بار شیئر بھی کیا جا چکا ہے۔
اگر اس تصویر کے نیچے دیکھیں تو اب تک اس پر 24119 کمنٹس دیے جا چکے ہیں جن کی تعداد روزانہ کی بنیاد پر بڑھ رہی ہے۔
ميك کی تصویر پر تبصرے کرنے والی زیادہ تر خواتین ہیں، جو ان کے چہرے اور شکل وشباہت کی تعریف کر رہی ہیں۔
بغیر کسی شک کے وہ سٹوكٹن پولیس محکمہ کے فیس بک صفحے پر سب سے مشہور مشتبہ مجرم بن گئے ہیں۔
سٹكٹن پولیس کا کہنا ہے کہ ميكس کو ایک آپریشن کے تحت پکڑا گیا ہے۔

"میری بیوی ابھی مجھ سے مل کر گئی ہے اور اس نے مجھے بتایا ہے کہ فیس بک پر میرے بارے میں بہت کچھ کہا جا رہا ہے۔ میں لوگوں کو بتانا چاہتا ہوں کہ میں کوئی بڑا سرغنہ نہیں ہوں۔"

جیریمی میِکس

پولیس محکمہ کے ترجمان جوزف سلويا کے مطابق ميكس پر ہتھیار رکھنے کے پانچ الزامات اور گینگسٹر ایکٹ کا ایک الزام عائد کیا گیا ہے۔
پولیس نے ميكس کو علاقے کے سب سے زیادہ متشدد مجرموں میں سے ایک قرار دیا ہے۔
ایک مقامی ٹی وی چینل کو جیل سے انٹرویو میں جیریمی ميكس نے کہا ہے کہ پولیس نے اس کی کار سے بندوق برآمد کی اور انہیں گرفتار کر لیا۔
انہوں نے کہا کہ ’میری بیوی ابھی مجھ سے مل کر گئی ہے اور اس نے مجھے بتایا ہے کہ فیس بک پر میرے بارے میں بہت کچھ کہا جا رہا ہے۔‘
انہوں نے کہا کہ ’میں لوگوں کو بتانا چاہتا ہوں کہ میں کوئی بڑا سرغنہ نہیں ہوں۔‘
فیس بک پر ان کی تصویر پر تبصرے کرنے والی خواتین ان کو ماڈلنگ کرنے کا مشورہ دے رہی ہیں۔
ایک خاتون ایلی ایبے نے لکھا کہ ’میں بھی اسے گرفتار ہی کر لیتی۔ میں نے آج تک اتنا ہاٹ مجرم نہیں دیکھا‘ جبکہ تانيا ایچ تھامس نے لکھا کہ ’وہ جرم کیوں کر رہا ہے جبکہ وہ ماڈلنگ کرکے کروڑوں کما سکتا ہے۔‘

"وہ جرم کیوں کر رہا ہے جبکہ وہ ماڈلنگ کرکے کروڑوں کما سکتا ہے۔"

تانيا ایچ تھامس

کئی لوگوں نے تو ان کے لیے فیس بُک پر فین پیجز بنا ڈالے ہیں جن میں ان کے چہرے کو مشہور برینڈز کے ماڈلز کی جگہ لگا کر شاید یہ ثابت کرنے کی کوشش کی گئی ہے کہ وہ ماڈلنگ کر کے کتنے حسین لگ سکتے ہیں۔
ایک فیس بُک صفحے پر اب تک ایک لاکھ 19 ہزار فین جبکہ دوسرے پر 50 ہزار سے زیادہ فینز ہیں۔
ميكس کو فی الحال سین جوكون کاؤنٹی جیل میں نو لاکھ ڈالر کی ضمانت پر رکھا گیا ہے۔
مگر فیس بک پر ميكس کے پرستار اس سب متاثر نہیں ہیں۔ امبر گومز نے تنقید کی ہے کہ ’چھ الزام اور نو لاکھ ڈالر کی ضمانت، خواتین پاگل ہو گئی ہیں۔‘
پولیس نے گرفتار کیے گئے دیگر تین لوگوں کے مگ شاٹ بھی فیس بک پر شیئر کیے گئے ہیں جنہیں اب تک قریباً ساڑھے تین سو کمنٹس ملے ہیں۔